Истражувачките универзитети во кои образованието се заснова на истражување се темел на општеството и стопанството засновани на знаење. Таквите универзитети се одликуваат со меѓусебна различност наместо униформност и сличност, како и со интердисциплинарност, мултидисциплинарност и трансдисциплинарност во образовното и истражувачкото дејствување. На таквите универзитети образовна парадигма е „учење преку истражување“.
Разликата меѓу универзитетските и стручните студии се заснова на фактот дека на стручните студии преовладуваат стручни наставни содржини преку кои претежно се усвојуваат вештини, иако постојат и наставни содржини во кои се усвојуваат (теоретски) знаења. На универзитетските студии преовладуваат универзитетски наставни содржини преку кои претежно се усвојуваат (теоретски) знаења, но постојат и наставни содржини во кои се усвојуваат вештини. Во таквиот концепт стручните студии би требало да бидат пофлексибилни за да можат брзо да одговорат на краткорочните барања на пазарот, додека универзитетските студии би требало да обезбедуваат подобри темели и фундаментални знаења поприлагодени на променливите барања на пазарот, технологијата и општеството. Меѓутоа, во двата вида студии требало би да се подготвуваат студентите за доживотно учење.
Нивото на квалитет на стручните студии потребно е да се унапредува и да се усогласи со нивоата на квалитет на истородните универзитетски студии преку постепено усогласување на минималните критериуми со меѓународно прифатените критериуми за акредитација на универзитетските и стручните студии. Стручните студии не смеат да се разликуваат од универзитетските по квалитет, туку по исходите од учењето.
